O pasado 28 de xuño tivo lugar o Foro Urbano no centro Ágora, de carácter participativo e aberto á cidadanía. Este foi o encontro máis numeroso de todo o proceso participativo da Axenda Urbana e tivo como obxectivo identificar os retos e necesidades actuais e futuras da cidade, así como recoller as propostas e solucións para a súa mellora.
Esta xornada pretendía validar e completar o diagnóstico realizado con anterioridade no resto de accións participativas como os encontros nos centros cívicos e o cuestionario en liña.
A asistencia ao Foro foi positiva, conseguindo unha participación de 96 persoas (78 % das previamente inscritas). Destas, un 53 % foron mulleres, destacando os grupo de idade de entre 30 e 60 anos, aínda que é resaltable que o grupo formado por menores de 30 anos tivo unha participación maior que o de maiores de 60.
A finalidade do Foro é a presentación dos datos obtidos nos diversos procesos participativos e a realización dunha serie de dinámicas participativas como punto final desta fase de A Coruña 2030.
A análise dos datos obtidos no Foro pode resumirse en tres tarefas principais:
- Transferir e tratar a información obtida.
- Elaboración dun informe de resultados.
- Detección dos principais retos e propostas por cada obxectivo estratéxico do proxecto a Coruña 2030, no seu deseño da Axenda Urbana.
A respecto destes resultados, podemos agrupalos en retos e obxectivos relacionados coas seguintes temáticas:
- Urbanismo, territorio e medio ambiente: o reto cun maior número de respostas foi o relacionado cunha xestión sostible e eficiente dos recursos. Despois, cuns resultados moi próximos entre si, atópanse retos vencellados ao urbanismo, procurando seguir fomentando a proximidade de servizos, espazos verdes, mellorar a calidade do espazo público nun modelo de cidade saudable e fomentar a mobilidade sostible.
- Inclusión, equidade, participación cidadá e vivenda: destacou o reto relacionado co acceso á vivenda, seguido de políticas sociais en materia de xénero, orixe ou idade.
- Empleo, economía urbana e circular: Os retos prioritarios foron todos aqueles relacionados co fomento da actividade económica e o impulso do emprendemento, destacando o relacionado coa necesidade de seguir implantando modelos de economía circular.
Grazas á realización do Foro Urbano A Coruña 2030 podemos contar coa visión de entidades, organizacións de relevancia, axentes económicos, sociais e os veciños e veciñas da Coruña, así como materializar nestes retos a orixe do debate e a interacción xerada neste proceso.
A Coruña 2030 